Në solidarizim me deputeten znj. Saranda Bogujevci

Jemi thellësisht të indinjuar nga incidenti i fundit i gjuhës seksiste drejtuar ndaj nënkryetares së Kuvendit të Republikës së Kosovës, Saranda Bogujevci, për zgjedhjen e saj për të pasur fëmijë. Kjo sjellje diskriminuese është e patolerueshme dhe nuk ka vend në shoqërinë tonë. Është skandaloze që dikush të përdorë gjuhë nënçmuese për të minuar zgjedhjet personale dhe vendimet e jetës së një gruaje.

Shoqëria në Kosovë duhet domosdo të mirëmbajë e kultivojë parimin e lirisë dhe barazisë. Sëkëndejmi është çështje lirie dhe e zgjedhjes personale për atë se si vendos të jetojë njeriu, me kë jeton, si dashuron e kë dashuron, dhe nëse do të krijojë familje, si do të krijojë familje. Institucionet e Republikës duhet të krijojnë kushtet në të cilat kjo liri respektohet e mundësohet absolutisht. Në asnjë mënyrë nuk lejohet që autoritetet publike t’ia ndalojnë njeriut lirinë e saj/tij, siç po propozojnë deputetë të caktuar të mazhorancës tash e sa herë. Liria e shprehjes dhe mendimi i lirë duhet respektuar. Por jo kur ai propozon ose kërkon cenimin e lirisë së tjetrit.Ne duam të bëjmë të qartë se solidarizohemi me Sarandën dhe të gjitha gratë që kanë qenë subjekt i sulmeve të ngjashme.

Është e domosdoshme që të punojmë drejt krijimit të një kulture ku fyerjet me bazë gjinore nuk janë kurrë të pranueshme dhe ku të gjithë individët respektohen për vlerën dhe dinjitetin e tyre të qenësishëm.Ne u bëjmë thirrje të gjithë politikanëve dhe personat publikë që të denoncojnë dhe të përmbahen nga përdorimi i gjuhës seksiste apo përfshirja në çfarëdo forme diskriminimi apo ngacmimi ndaj grave. Ne duhet të punojmë së bashku për të ndërtuar një shoqëri që vlerëson dhe respekton diversitetin, barazinë dhe të drejtat e njeriut për të gjithë.