Instituti për Politika Sociale Musine Kokalari, më 23 korrik, mbajti takimin fillestar në Kuvendin Komunal të Istogut me Kryesuesin e Kuvendit, Drejtoreshën për Mirëqenje Sociale në Istog dhe përfaqësuesit e grupeve të asambleistëve të partive politike të kësaj komune.
Qëllimi i takimit ishte prezantimi i Grantit Institucional, i mbështetur nga Fondacioni Kosovar për Shoqëri Civile (KCSF), si dhe prezantimi i komponentit të projektit që fokusohet në bashkëpunimin me kuvendet komunale në pesë komuna të Kosovës. Ky komponent synon krijimin e grupeve tematike të asambleistëve, të fokusuara në politika sociale dhe në përmirësimin e shërbimeve sociale në nivel lokal.
Gjatë takimit u diskutua nevoja për ngritjen e kapaciteteve të asambleistëve në fushën e politikave sociale, me theks të veçantë tek asambleistët e rinj dhe roli i tyre në mbikëqyrjen, diskutimin dhe avancimin e shërbimeve sociale në komunë.
Kryesuesi i Kuvendit Komunal të Istogut Enver Rugova, si dhe përfaqësuesit e grupeve të asambleistëve nga partitë politike, e vlerësuan pozitivisht qëllimin e projektit dhe u zotuan për bashkëpunim të ngushtë me Institutin gjatë tri viteve të zbatimit të tij.
Ky takim shënon hapin e parë drejt ndërtimit të një bashkëpunimi më të strukturuar ndërmjet Institutit, kuvendeve komunale, asambleistëve dhe qytetarëve, me qëllim forcimin e rolit të nivelit lokal në adresimin e nevojave të qytetarëve dhe përmirësimin e shërbimeve sociale.
Ky aktivitet përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia